يوم,, بدوام عن بعد...

يوميات • تفاصيل صغيرة تستاهل نتذكرها

يوم… بدوام عن بُعد

بين الشغل والقهوة… ولحظات البيت

أغرب شي بالدوام عن بُعد… إنك تكونين موظفة، و ببيتك، وأم… كلها بنفس اللحظة.

• • •

✦ 01 ✦

أربع ونص… بداية اليوم

يومي بدأ الساعة أربع ونص الفجر. صحيت، جهزت العيال للمدرسة، ودعتهم… ورجعت نمت. لأن بصراحة، أربع ونص مو بداية يوم بالنسبة لي… هذي للحين محسوبة على أمس 😂

صحيت مرة ثانية ثمان ونص، والشغل ينتظرني. وأعرف نفسي: لو فتحت اللابتوب أول ما أصحى، اليوم كله بيروح شغل.

عشان كذا فيه شي ما أتنازل عنه: القهوة.

أسويها بنفسي، واستمتع بصوت قطرات القهوه … مو لأنها بتنجز الشغل عني، بس كأنها تقول لي: اصبري، اليوم توّه يبدأ.

• • •

✦ 02 ✦

بريك صغير… وحصان من الخرز

بعدها بدأ الدوام فعلًا. مهمة ورا مهمة… وبين وقت ووقت أسرق لي بريك صغير. بس البريك عندي مو إني أقلّب بالجوال. أحب أسوي شي بيدي، شي ما له علاقة بالشغل ولا بالمواعيد ولا بأحد ينتظر مني رد.

واليوم كان دور الخرز.

أرصّ الخرز على اللوح، لون هنا ولون هناك، وبعدين أكويه بالمكواة الصغيرة لين يلصق ببعض… و طلع معي هالحصان الصغير.

ميدالية حصان 🐴 شي بسيط مره, بس هالأشياء البسيطة تفصل مخك عن ضغط الشغل. عشر دقايق تسوي فيها شي تحبه… وترجع كأنك بديت من جديد.

• • •

✦ 03 ✦

إذا ماما بالبيت… يعني ماما لي

طبعًا اليوم كان عندي ظرف إضافي صغير و حلو : صغيرتي غايبة. الله يهديها 😂

وموقفها من الدوام عن بُعد كان واضح مره: إذا ماما بالبيت… يعني ماما لي. ما عندها شي اسمه دوام، ولا اجتماعات، ولا مهام لازم تخلص. كل شوي تبي تجلس معي، أو بحضني، أو ألتفت لها.

وهذي اللقطة تلخص الدوام من البيت كله:

اللابتوب قدامي… وهي بحضني تتفرج على بلوي. برا الشمس والحرارة ٣٩ درجة، وداخل البيت عالمين ماشين في نفس اللحظة: أحاول أنجز هنا… وأكون معها هنا.

• • •

✦ 04 ✦

انتهى الدوام… وبقيت التفاصيل

وبين مهمة وقهوة، وبين حصان صغير وبنت ما تبي أمها تنشغل عنها… مشت الساعات. وفجأة، انتهى الدوام. طالعت قائمة المهام: كلها منجزة وفي وقتها، الحمد لله.

يمكن لو أحد شاف يومي من بعيد بيقول: يوم عادي جدًا. بس أحيانًا الأيام ما تحتاج أحداث كبيرة عشان تستاهل نتذكرها.

يكفي إنك بديت يومك أربع ونص الفجر، وخلصته وشغلك منجز، وسويت ميداليه صغيره… وبنتك للحين بحضنك. 🤍